1687 Notariatus terrestris Calissiensis Gnoso Andreae Modlibowski post ascensum Gnosi Molski ad dapiferatum Calissiensem

Actum in terminis terrestribus particularibus Calissiensibus feria secunda post festum sancti Michaelis Archangeli proxima [6 X] anno Domini millesimo sexcentesimo octuagesimo septimo Calissii celebratis.

In quibus praesidebant generosi Albertus Przespolewski judex, Joannes Carolus Scibor Marchocki subiudex, Andreas Modlibowski notarius, terrestres Calissienses. Praesentibus generosis Adamo Molski dapifero terrestri et judice surrogato castrensi Calissiensi, Chrisosthomo Gorzenski zuppario Bydgostiensi, Matthia Twardowski burgrabio terrestri Calissiensi, Vladislao Pawłowski vicepalatino Calissiensi, Vladislao Tarchalski, Stanislao Linowski, Alberto Bartoszewski, Alexandro et Raphaele Biskupski, Stanislao Linowski, Casimiro Łopatecki, Sebestiano Molski, Francisco Kowalski, Alberto Pogorski, Joanne Trampczynski, Casimiro Meier regente terrestri, Stanislao Pęgowski regente castrensi, Calissiensibus, Alberto Pęgowski, Stanislao Wolski, Casimiro Kiełczewski, Martino Bielczewski, Joanne Korytkowski, Valentino Dobrosielski, Andrea Obiezierski, Melchiore Paxynski, [k. 1v] Ferdinando Poklatecki, Adamo Makowiecki, Alberto Bogusławski, Andrea Skępski, Casimiro Klimacki et aliis plurimis circa actum existentibus ac stante quoque ministeriali Regni generali provido Josepho Kozanecki de oppido Pleszow.

Coram judicio terrestri Calissiensi actisque judicii eiusdem personaliter comparens generosus Andreas Modlibowski notarius terrestris Calissiensis obtulit eidem judicio literas infrascriptas sibi offerenti super notariatum terrestrem Calissiensem a Sacra et Serenissima Regia Maiestate benigne collatas manuque ipsius propria subscriptas, sanas, salvas et illaesas nullaque suspicionis nota ut ex eis apparebat carentes, sigillo minoris cancellariae Regni communitas, quarum literarum tenor sequitur estque eiusmodi:

„Joannes tertius Dei gratia rex Poloniae, magnus dux Lithuaniae, Russiae, Prussiae, Masoviae, Samogitiae, Livoniae, Podoliae, Podlachiae, Wollyniae, Kiioviae, Smolensciae, Severiae Czerniechoviaeque.

Significamus praesentibus literis notris quorum interest universis et singulis. Quod cum nobis de more et consuetudine veteri dignitarii, officiales universaque nobilitas palatinatus Calissiensis quatuor candidatos pro notariatu terrestri Calissiensi per electionem proposuerint et quemlibet de iisdem praefato officio dignum singulariter commendaverint, nos habentes respectum meritorum generosi Andreae Modlibowski notarii castrensis Calissiensis quibus competentem per tot occasiones easque varias promeruerit honorem, insuper volentes ipsum ad ulteriora tam de domo nostra regia quam etiam de republica allicere obsequia faciendum esse duximus ut illi vacantem ad praesens notariatum terrestrem Calissiensem idque post ascensum generosi Adami Molski ultimi et immediati notarii ad dapiferatum Calissiensem dispositioni nostrae obnoxium tanquam de quatuor candidatis uni daremus et conferremus uti quidem cum omnibus juribus, praerogativis et immunitatibus tenendum, habendum et possidendum damus et conferimus praesentibus literis nostris ad extrema vitae ipsius tempora vel maioris alicuius dignitatis assecutionem.

Quod omnibus quorum interest, praesertim vero dignitariis, [k. 2] officialibus totique nobilitati palatinatus Calissiensis notum esse volentes mandamus ut praedictum generosum Andream Modlibowski ab hinc pro vero et legitimo notario terrestri Calissiensi habeant et agnoscant eique de loco juribus, praerogativis et immunitatibus tum quibusvis obventionibus hoc officium de lege et antiqua consuetudine concernentibus et ipsi respondeant et ab illis responderi curent, pro gratia nostra regia suorumque officiorum debito. In quorum fidem praesentes manu nostra subscriptas sigillo Regni communiri mandavimus.

Datum in castris ad Jazłowiec die vigesima secunda mensis Septembris anno Domini millesimo sexcentesimo octuagesimo septimo, Regni vero nostri tredecimo anno.

Notariatus terrestris Calissiensis generoso Andreae Modlibowski post ascensum generosi Molski ad dapiferatum Calissiensem.

(-) Albertus Stanislaus Chroscinski, Sacrae Regiae Maiestatis secretarius, manu propria.

(-) Joannes rex.

Locus sigilli maioris cancellariae Regni.”

Quibus quidem literis judicio praesenti taliter oblatis eisdemque palam omnibus lectis et deductis praestitit juramentum corporale in facie judicii eiusdem, observata debita jurisiurandi religione flexis genibus ad immaginem crucifixi Domini nostri Jesu Christi rotha in statuto Regni descripta tenoris talis:

„Ego Andreas juro, quia juste secundum Deum, ius scriptum, aequitatum [!] et partium controversias iudicabo, consulam judici fideliterque partium recognitiones, controversias, affectationes seu postulationes juridicas vel judicis decreta in librum actorum terrestrium inscribam et inscribi curabo, divitis et pauperis, amici et inimici, civis et peregrini discrimine sublato et neque favorem, neque odium, neque praemium, neque poenam mihi proposita [!] curabo, sed in judicando, consulendo et scribendo solum Deum et justitiam sanctam et aequitatem partium, recognitiones, controversias ac judicii sententias in hisque omnibus conscientiae meae judicium sequar et audiam, aliaque negotia mihi incumbentia fideliter et pro posse meo peragam.

Sic me Deus adiuvet et sancta crux Christi.”

Quod quidem juramentum modo suprascripto praestitum tum et literas supra oblatas judicium praesens terrestre Calissiense actis praesentibus judicii sui connotari fecit, originale vero earundem literarum praedicto offerenti generoso notario ad manus eiusdem extradidit.

Or.: Kalisz Z. 149, dekrety/indukta, 1687-1690, k. 1-2.

Nominacja G. Andrzeja Modlibowskiego na pisarza zs. kaliskiego po objęciu przez G. Adama Molskiego stolnikostwa kaliskiego oraz jego przysięga.

1638 Tribunatus Calissiensis post mortem generosi olim Seraphini Głębocki generoso Joanni Wawrowski notario castrensi Calissiensi confertur

Tribunatus Calissiensis post mortem generosi olim Seraphini Głębocki generoso Joanni Wawrowski notario castrensi Calissiensi confertur.

Vladislaus IV Dei gratia Rex Poloniae etc. Significamus etc. Meretur singularis generosi Joannis Wawrowski notarii castrensis Calissiensis in obeundis functionibus [k. 150] sua dexteritas probataque in promovendis publici boni rationibus prudentia ac fervens de nobis bene merendi studium ut amplioribus functionibus eum condecoremus uberioremque exercendarum virtutum campum eidem praebeamus, vacantem itaque et ad dispositionem nostram post decessum generosi olim Seraphini Głembocki devolutum tribunatum Calissiensem eidem praefato generoso Joanni Wawrowski ut agnoscat nos praestantissimis ipsius animi ingeniique dotibus favere dandum et conferendum duximus damusque et conferimus praesentibus litteris nostris per ipsum ad extrema vitae tempora vel maioris alicuius dignitatis assecutionem cum omnibus praerogativis, immunitatibus et obventionibus gerendum et obtinendum.

Quod omnibus quorum interest, praesertim vero dignitariis, officialibus ac universae nobilitati palatinatus Calissiensis notum esse volentes eisdem mandamus ut eundem generosum Joannem Wawrowski pro vero et legitimo tribuno palatinatus Calissiensis habeant et agnoscant ipisque de loco juribus, praerogativis et immunitatibus antiquitus ad idem munus pertinentibus respondeant et responderi ab aliis curent, pro gratia nostra officiorumque suorum debito. In cuius rei fidem etc.

Datum Varsaviae die xxviii mensis Junii [k. 150v] anno Domini millesimo sexcentesimo trigesimo octavo, Regnorum nostrorum Poloniae et Sueciae VI anno.

(-) Wladislaus rex.

(-) Alexander Trzebienski decanus Sandomiriensis.

Or.: Metryka Koronna, Primum regestrum privilegiorum et inscriptionum cancellariae maioris -- ad relationem -- Petri Gembicki -- supremi cancellarii Regni, 1638, AGAD sygn. MK 183, k. 149v-150v.

Nadanie wakującego po śmierci G. Serafina Głębockiego wojstwa kaliskiego G. Janowi Wawrowskiemu pisarzowi grodzkiemu kaliskiemu.

1755 Juramentum Mci Morawski super Notariatum Castren. Posn.

Actum in castro Posnaniensi sabbatho ante festum sanctae Margarethae Virginis et Martyris proximo [12 VII] anno Domini 1755.

Coram illustri et magnifico Vladislao a Szołdry Szołdrski palatino Junivladislaviensi, Majoris Poloniae generali, Rogosnensi etc. capitaneo, in praesentia generosorum Feliciani Josephi bini nominis Slezanowski vice notarii loci praesentis, Ignatii Urbanowski, Raphaelis Jarochowski, Casimiri Bykowski et aliorum plurimorum juramento huic adstantium.

Juramentum magnifici Morawski super notariatum castrensem Posnaniensem.

Coram officio et actis praesentibus castrensibus Posnaniensibus personaliter [s. 99] comparens magnificus Joannes Morawski, juramentum super officium notariatus castrensis Posnaniensis in tenore tali:

„Ego Joannes juro Deo Omnipotenti in Trinitate Uni, quia in officio notariatus castrensis Posnaniensis mihi per illustrem et magnificum Vladislaum a Szołdry Szołdrski palatinum Junivladislaviensem, Majoris Poloniae generalem, Rogosnensem etc. capitaneum comisso [!] justitiam fideliter administrabo, justeque secundum Deum jus scriptum, aequitatem, partium controversias judicabo, judici consulam, recognitiones ac controversias et decreta in librum actorum officii mei inscribam et inscribi curabo, divitis et pauperis, amici [s. 100] et inimici, civis et peregrini, discrimine sublato et neque favorem, neque odium, neque praemium, neque poenas mihi propositas curabo, sed solum Deum justitiam sanctam prae oculis habebo, in hisque omnibus conscientiae meae judicium sequar et audiam, aliaque negotia officio notariatus loci praesentis incumbentia fideliter et pro posse peragam.

Sic me Deus adjuvet et haec sancta Jesu Christi passio.”

praestitit et explevit.

Ex protocollo castrensi Posnaniensi extractum.

(-) Correxit Ziemięcki.

(-) Legi: Łabiński.

Odp.: Papiery Morawskich. Akta poznańskie 1744-1783, s. 98-100 (Lwów, Biblioteka Naukowa im. W. Stefanyka NAN Ukrainy. Oddział Rękopisów. Zespół 4, dział I, sygn. 1064).

Dworzaczek:

Grodzkie i ziemskie > Poznań > Inskrypcje > XVII/XVIII wiek

6995 (Nr. 1314) 1755

Fabjan Jozef Slezanowski podpisek gr. pozn.; Jan Morawski przysięga na urząd pisarza gr. pozn. (f. 114)