1631 Fundationis Archiconfraternitatis SSmi Rosarii BMV. in Gostyn Confirmatio

Ad perpetuam rei memoriam. Frater Georgius Trębnic Sacrae Theologiae Doctor, Prior Provincialis Provinciae Poloniae Ordinis Praedicatorum.

Universis et singulis, quorum interest, notum facimus: Expositum nobis fuisse: quomodo Reverendus Dominus Bartholomaeus Hesperus Parochus Gostynensis, una cum Illustri et Magnifico Domino Andraea Gostynski Borek Sacrae Regiae Majestatis Secretario, zelo Devotionis erga Beatissimam Mariam Virginem ductus et accensus, tum ut fidelem populum ad eandem magis ac magis inflammaret, ab Antecessore nostro fundationem Archiconfraternitatis Sacratissimi Rosarii, in Oppido Gostyn in Ecclesia tituli Visitationis Beatissimae Virginis Mariae Dioecesis Posnaniensis impetraverit, eamque diligenti sollicitudine propagaverit ac dilataverit;

Supplicatumque fuit nobis ab eodem Reverendo Domino Bartholomaeo Hespero Parocho Gostynensi et Generoso Domino Andraea Gostynski, ut eandem Institutionem quo fervor Fidelium erga Beatissimam Mariam Virginem cresceret, Authoritate nostra confirmaremus.

Quorum nos piis annuentes petitionibus, tanto libentius eam duximus esse confirmandam, quanto ardentius promovendi, dilatandique honoris et gloriae Dominae nostrae Virginis Mariae in hac Provincia nostra in votis semper habuimus ac habemus. Quam ob rem Authoritate Officii nostri, ac praesentum tenore, praefatam fundationem Archiconfraternitatis Sacratissimi Rosarii Beatissimae Virginis Mariae in praefato Oppido, in Ecclesia tituli Visitationis Beatissimae Virginis Mariae, Dioecesis Posnaniensis confirmamus, approbamus et ratificamus, et confirmatam, approbatam, ratificatamque /: servatis tamen servandis :/ declaramus esse, et decernimus cum omnibus gratiis, gratuitis et caeremoniis et observationibus in eadem Archiconfraternitate fieri consuetis: Mandantes omnibus et singulis nostrae jurisdictioni subjectis Fratribus in virtute Spiritus Sancti et sanctae obedientiae, ne aliquis eam impedire, aut quovis modo ei derogare audeat, quibusvis in contrarium non obstantibus.

In quorum omnium fidem, his sigillo majori nostri Officii per appensionem munitis, manu propria subscripsimus.

Datum in Conventu nostro Posnaniensi die vigesima Julii, Anno Domini 1631.

(-) Fr. Georgius qui supra mp.

/: L. appensi S. :/

(-) Regestrata fol. 221. Fr. Raymundus Klonowicz loco Socii mp.

Źródło: Święta Góra, „Dopisy Do Rękopisma Zbiór Wiadomości o Świętéj Górze pod Gostyniem”, sygn. A/11, s. 23, wpis XXI (odpis)

Zatwierdzenie aktu erekcyjnego Arcybractwa Różańca Świętego.

Brat Jerzy Trębnic, prowincjał (prior provincialis) polskiej prowincji Braci Kaznodziejów na prośbę Bartłomieja Hespera, proboszcza gostyńskiego oraz Andrzeja Borek Gostyńskiego, sekretarza JKM i dziedzica Gostynia, zatwierdza wydany przez swego poprzednika akt erekcyjny Arcybractwa Różańca Świętego w kościele pw. Nawiedzenia NMP w Gostyniu.

Dokument wydano w poznańskim konwencie dominikanów.

Wzmianka o tym piśmie - na stronie 50 „Zbioru wiadomości o Świętej Górze pod Gostyniem” (http://wbc1.wbc.poznan.pl/dlibra/docmetadata?id=252836).