1675 Oblata lrarum salvi conductus pro pte spectabilis Hankiewicz servientium

Actum in castro Posnaniensi sabbatho post dominicam Laetare quadragesimalem proximo anno Domini millesimo sexcentesimo septuagesimo quinto.

Ad officium et acta praesentia castrensia Posnaniensia personaliter veniens honestus Stanislaus Kozłowski ministerialis Regni generalis officio notus, sanus existens, obtulit eidem officio ad acticandum et ingrossandum in acta sua literas salvi conductus illustrissimi et reverendissimi Andreae Olszowski Dei gratia archiepiscopi Gnesnensis infrascriptas, manu sigilloque suae illustrissimae celsitudinis propriis subscriptas et communitas, sanas, salvas et illaesas omnique prorsus suspitionis nota prout ex eis apparebat carentes, tenoris talis:

„Andreas Olszowski Dei gratia archiepiscopus Gnesnensis, legatus natus, Regni Poloniae et Magni Ducatus Lithuaniae primas primusque princeps.

Significamus praesentibus literis nostris quorum interest, universis et singulis muneris jurisque esse nostri primatialis, cum durante in longumque protracto moderno interregno ante coronationem et ob absentiam regiam exerceri regalia non possint, petentibus opem jurisque beneficia, pro jure nobis competenti impertiri. [s. 2]

Cum itaque expositum sit nobis nomine spectabilis Matthiae Haukiewicz proconsulis Posnaniensis ipsum in judiciis kapturalibus Posnaniensibus in causa et actione per instigatorem judicii eiusque delatorem generosum Dobrogostium Belędzki subiudicem terrestrem et judicem kapturalem Posnaniensem eidem spectabili proconsuli,

ratione quasi per ipsum temeraria praesumptione in contemptum judiciorum kapturalium et praenominati generosi delatoris, dum idem judicio kapturali assideret, familiae praetorianae in lapideam Bucina nuncupatam, ubi currus famatorum Nerlichow coniugum proprii, delatorem [?] vero, vigore obligationis et decretorum spectantium [?] exstabant super immissionis eorundemque curruum et aliorum praeparamentorum vi violenterque a famulis delatoris receptionis atque ad eundem citatum deductionis etc. instituta,

in contumaciam ipsius tam in anterioribus judiciis, videlicet sub actu feria secunda in crastino festi sanctorum Simonis et Judae Apostolorum anno proxime praeterito millesimo sexcentesimo septuagesimo quarto [29 X 1674], in poena bannitionis perpetuae, quam etiam subsequentibus judiciis feria secunda post festum sancti Andreae Apostoli anno eodem [3 XII 1674], in approbatione eiusdem poenae condemnatum et publicatum esse.

Postulatumque a nobis nomine eiusdem spectabilis Hakiewicz etc. ut ipsi authoritate nostra primatiali per literas salvi conductus, prout de jure, subveniremus. Cui postulationi nos [s. 3] facile annuendo legibusque Regni inhaerendo easdem salvi conductus nostri literas dandas esse duximus damusque praesentibus ad decursum trium mensium, nisi interea coronatio serenissimi regis electi Joannis tertii subsecuta fuerit, ex tunc enim valor praesentium cessaret.

Quibus quidem literis salvi conductus fretus ac munitus, toto secure et absque perhorrescentia quarumvis personarum ubique locorum in Regno dominiisve eiusdem et in civitate Posnaniensi versari, negotia sua quaevis licita et honesta peragere, actus juridicos exercere atque coram quibusvis judiciis et officiis comparere et respondere poterunt [!], personis bonisque ipsius salvis et immunibus, ita tamen ut se paccate gerat, beneficioque harum literarum non abutatur, atque cum parte adversa jure agat et experiatur.

Quod et ad notitiam omnium quorum interest, praesertim vero magistratuum et officiorum judiciorumque Regni nominatim kapturalium deducendo requirimus, ut hasce salvi conductus literas ad acta publica suscipi publicarique faciant, nec a quopiam vim inferri dicto proconsuli permittant, iuxta praescriptum legum publicarum et sub poenis in violatores literarum salvi conductus sancitis.

In cuius rei fidem praesentes manu nostra subscriptas, sigillo quoque nostro muniri iussimus.

Datum Skiernieviciis die vigesima secunda mensis Marcii anno Domini millesimo sexcentesimo septuagesimo [s. 4] quinto.

(-) Andreas Olszowski archiepiscopus Gnesnensis.

Locus sigilli suae illustrissimae celsitudinis.”

Quas quidem literas praeinsertas suprapraefatus ministerialis offerens se die hodierna actu descripta in quatuor partibus fori civitatis praesentis Posnaniensis in frequentia multorum hominum varii status, sexus et conditionis existentium alta, clara, sonorosa, intelligibilique voce sua publicasse, proclamasse et ad notitiam omnium deduxisse attestatus est.

Quarum quidem literarum originale idem offerens ad se recepit et de recepto officium praesens quitavit quietatque praesentibus.

Ex actis castrensibus Posnaniensibus extractum.

(-) Jerzykowski, mp.

[in dorso] Oblata literarum salvi conductus pro parte spectabilis Haukiewicz servientium. Od JMX Olszowskiego arcybiskupa gniezn. 1675. In causa Nerlicha.

Źródło: Poznań, Dokumenty miasta Poznania, Ekstrakt z akt grodzkich poznańskich, oblaty listu żelaznego wydanego w 1675.III.22 w Skierniewicach przez Andrzeja..., APP sygn. D 517, s. 1-4.

Opis z WBC: Ekstrakt z akt grodzkich poznańskich oblaty listu żelaznego wydanego w 1675.III.22 w Skierniewicach przez Andrzeja Olszowskiego arcybiskupa gnieźnieńskiego i prymasa Polski dla burmistrza miasta Poznania, w związku z pozwaniem go przed sądy kapturowe o zatrzymanie ruchomości Nerlichów, i z powodu nieobecności króla i niemożności odbycia sądów przed koronacją.