1811 Resignatio Beneficii Curati in villa Gora Decanatu Neomestensi

Copia Resignationis factae

Resignatio Beneficii Curati in villa Gora Decanatu Neomestensi, expedita Anno ab Incarnatione Christi Domini Millessimo Octingentesimo Undecimo, Coronatione vero Sanctissimi Domini nostri, feliciter moderni Pii VII Pontificis Maximi Decimo, Indictione Romana XIV, Die Octava mensis Julii.

Ad Officium et Acta praesentia Tabellionatus Publici Apostolici personaliter veniens AR Laurentius Kozierowski Ecclesiae Parochialis in villa Gora, Decanatu Neomestensi Curatus, mente et corpore sanus existens, produxit Literas ex Cancellaria Officii Generalis Curiae Episcopalis Posnaniensis, de data Poznan, die secunda mensis et anni currentium, ad Illustrem Magnificum Victorem Comitem Szołdrski Bonorum Gora cum attinentiis Haeredem, et Ecclesiae ibidem Patronum et Collatorem directas et expeditas, vigore quarum Literarum, dum et quando facultatem Resignandi suam Parochialem Ecclesiam, quam hucusque in dicta villa Gora regit et possidet, sibi datam coram me infrascripto notario, suo effectus mandandam debite et sufficienter probaverit, ad executionem earundem Literarum in termino hodierno procedi, cum eo, quo par est instantia postulavit. In Praesentia A:R: Matthaei Bomblewski Ecclesiarum Parochialium in Noskowo Curati, in Rusko Comendarii, tum Generosi Adalberti Szymanowski Bonorum praefatorum villae Gora Aeconomi, et aliorum bene multorum.

Et ego Adalbertus Suchowski Publicus Sacra Authoritate Apostolica Notarius, Pempoviensis Praepositus, visis et lectis ejusmodi Literis, habito etiam Partium consensu, nulla vero ex adverso contraventione audita, ante omnia ad perpendenda motiva et rationes sputandas, tum ad expediendum Resignationis actum me conferre proposui, uti etiam me contuli. Et protinus is idem A:R: Laurentius Kozierowski Curatus, procedendo ulterius, ad effectuandum, nempe praesens negotium, imprimis, tam prae senio quo atteritur, quam debilitate virium, cui evidenter subjacet, non amplius ad Regimen Ecclesiae et Beneficii, quibus hucusque praeerat, idoneum se, et habilem esse fassus et testatus est, eamque ob causam, praedictam Ecclesiam et Beneficium sponte, libere, simpliciter, pure, absque ullo pacto seu conditione, non in favorem tertii, sed directe in manus Illustris Patroni et Collatoris Supramemorati resignare. Iisdemque tum omnibus et singulis Redditibus, Censibus, Proventibus, Privilegiis, Titulis, Gratiis, oneribus ac Officiis Administrationem Spiritualium et regimen temporalium rerum concernentibus, nunc et in perpetuum, nullo sibi ad eandem Ecclesiam et Beneficium regressu vel ingressu servato, renuntiare intendit, et se plenarie determinat uti etiam Resignat, et irrevocabiliter renuntiat per Praesentes.

Et ego qui supra Notarius Apostolicus, determinationi ejusmodi insistendo, tam Resignationem praedictae Ecclesiae ac Beneficii, quam Renuntiationem eisdem acceptavi, Fidemque publicam facio, et ex Officio meo praesentibus declaro Ecclesiam Parochialem ac Beneficium in saepe dictis Bonis villae Gora situatum, hucusque per praelibatum A:R: Laurentium Kozierowski possessum, a termino hodierno in manus Illustris Collatoris, Comitis Szołdrski cum data? eidem venia et facultate alium pro jure suo ad eandem Ecclesiam nominandi Presbyterum, per toties dictum A:R: Kozierowski sponte, libere, simpliciter, et in perpetuum resignatum esse et existere, salva nihilominus de anno gratiae sibi Resignanti, pro hac sola vice et ultimario, competenti sorte, quam sibi Ille, actus praesentis vigore praecustoditam haberi intendit, et a qua recedere nequit.

Qui quidem Resignationis actus modo praemisso completus, Praesentibusque, quorum intererat perlectus, manibus eorum propriis subscriptus est, ut sequitur.

Laurentius Kozierowski mpp.

Matthaeus Bąblewski, Curatus in Noskowo, Commendarius in Rusko ut testis mpp.

Adalbertus Szymanowski, Aeconomus Generalis Bonorum Gora et aliorum ut testis manu propria

Adalbertus Suchowski, Notarius Apostolicus, Praepositus Pempoviensis mpp.

Tandem ego qui supra Notarius actus ejusdem extractum, in forma probanti confici et ad Illustrissimum Officium Generale Curiae Episcopalis Posnaniensis, intuitu ulterioris de taliter Resignato Beneficio obtinendae, cum eo quo par est Reverentia remitti feci anno, die, mense et in loco, quibus supra.

(-) A. Suchowski mpp.

LS

Ex Protocollo Notariatus Publici extractum et Sigillo ejusdem communitum testor.

(-) Adalbertus Suchowski, qui supra mpp.

Góra dek. Nowe Miasto, "Liber Baptisatorum" 1805-1835, AAP sygn. PM 090/05, f. 203

Rezygnacja plebana Góry z urzędu i beneficjum wobec notariusza apostolskiego spisana.

sputandas - ?