1749 Decretum inter excellentem et admodum reverendum Szuberski actorem ab una et spectabilem magistratum Lesnensem citatum ab altera partibus latum

Anno Domini millesimo septingentesimo quadragesimo nono, die vero Mercurii decima octava mensis Junii.

In publica causarum audientia illustrissimi et reverendissimi domini Josephi comitis de Werbno Pawłowski¹, Dei et Apostolicae Sedis gratia episcopi Niochensis, in ecclesia cathedrali archidiaconi Pscevensis, vicarii in spiritualibus et officialis generalis Posnaniensis comparens personaliter excellens et admodum reverendus M. Martinus Szuberski², philosophiae doctor, ecclesiae parochialis Zytovecensis curatus, uti et tanquam altaris Beatissimae Mariae ad Nives in ecclesia parochiali Costensi situati altarista, actor principalis, in termino ex literis citationis simplicis debite, ut a tergo apparebat, executis, provenienti, in diem hodiernam legitime incidenti, contra infrascriptos,

occasione denegatae exolutionis census a summa originali mille florenorum Polonicalium in et super lapidea Steierowska dicta inscripta provenientis, actorem concernentis, ab ultima quietatione retentis,

citatos proposuit, petens eosdem ad directam responsionem stringi, alias productis documentis literatoriis ut pote scriptis binis manualibus, uno in anno millesimo septingentesimo trigesimo quarto, altero vero de anno millesimo septingentesimo trigesimo quinto conscriptis, summam praefatam mille florenorum Polonicalium evincen(do) mediante decreto judicii praesentis sub die Mercurii decima quinta Decembris anno Domini millesimo septingentesimo quadragesimo quinto approbato, quibus inhaerendo dictos citatos ad solutionem census a praetacta summa mille florenorum Polonicalium juris mediis compelli debita cum instantia postulavit.

Praesente nobili Bartholomaeo Barent Sacrae Regiae Maiestatis secretario, spectabilium proconsulis ac consulum totiusque magistratus civitatis Lesnensis citatorum ex adverso principalium plenipotente, salvis etc. et protestando de indebita ad judicium praesens provocatione litisque expensarum causatione citra competentiam actionis causam praesentem praeventam esse in judicio Lesnensi, quo in judicio respectu potioritatis lapideae Sztejerow intercessit decretum [s. 45] locandorum variorum creditorum, inter quos etiam modernus actor cathegoriam suam promovit, dicente eandemque causam ad idem judicium Lesnensem ubi caepta est, ne confundantur jurisdictiones et salva sint jura civitatensia ad congeriem creditorum remitti exposcente et libertatem a termino flagitante.

Et illustrissimus ac reverendissimus dominus episcopus Niochensis et officialis generalis Posnaniensis supra memoratus pro tribunali sedens etc., auditis partium propositis et responsis eoque considerato, quod causa praesens sit praeventa in judicio civitatensi Lesnensi ibidemque decretum potioritatis lapideae Stejerow intercessit actorque modernus inter alios creditores cathegoriam suam respectu summae mille florenorum Polonicalium promovit, prout id decretis authenticis demonstratum est. Proinde suspensa adjudicatione censuum praetensorum causam eandem, ne confundantur jurisdictiones, ad idem judicium Lesnensem pro ulteriori resolutione remisit, et quatenus citati praetactam causam in spatio unius mensis resolvant, summamque praetensam uti ecclesiasticam praemissisque literis crydae et aliis servatis servandis solennitatibus erectam ac approbatam, prae aliis debitis et creditoribus praeferibiliorem adinveniant, decrevit, et ad eum effectum mandatum executivum cum termino sex dierum relaxavit et ex cancellaria extradere mandavit, prout etc.

Praesentibus perillustribus et reverendissimis Antonio Payszczewski, Constantino Marszewski, Joanne Woroniecki canonicis ecclesiae cathedralis Posnaniensis, meque Stephano Skrzebowski apostolico et consistorii generalis Posnaniensis actuario notario.

Ex actis consistorii generalis Posnaniensis extractum et sigillo praelibati illustrissimi ac reverendissimi domini episcopi Niochensis, vicarii in spiritualibus et officialis generalis Posnaniensis, communitum.

(-) Stephanus Skrzebowski apostolicus et consistorii generalis Posnaniensis notarius, mp.

[s. 46, in dorso] Decretum inter excellentem et admodum reverendum Szuberski actorem ab una et spectabilem magistratum Lesnensem citatum ab altera partibus latum. 1749no.


Źródło: Styer’sche Konkursakta - sprawa majątkowa, APP Akta miasta Leszno, sygn. I/304, s. 44-46

Dekret sądu konsystorskiego w sprawie między ks. Marcinem Szuberskim, proboszczem żytowieckim, jako powodem a magistratem leszczyńskim, jako pozwanym, reprezentowanym przez plenipotenta Bartłomieja Barenta, sekretarza JKMci. W sprawie o należny ks. Szuberskiemu czynsz od sumy 1000 zł z kamienicy Sztejerów w Lesznie, sąd odsyła sprawę do dalszego rozpatrzenia przed sądem leszczyńskim. Ma ona zostać rozstrzygnięta w ciągu miesiąca, a ks. Szuberski powinien – na ile to możliwe – uzyskać pierwszeństwo w kolejce wierzycieli do tej kamienicy.

¹ Józef z Werbna Pawłowski (1698-1759), oficjał poznański od 1745, biskup pomocniczy poznański od 1748.
² Marcin Szuberski, proboszcz żytowiecki 1729-1762 (Walenty Wojtyński, Elenchus seu series vita functorum curatorum ad ecclesiam Żytoviecensem existentium, quos descripsi ex libro metricarum propter memoriam, AAP sygn. PM 341/01, s. 3), tu zarazem altarysta NMP Śnieżnej w Kościanie.