1581 Resignatio census in et super tota et integra villa Kakawa

Resignatio census in et super tota et integra villa Kakawa

Comparentes personaliter coram iudicio terminorum terrestrium particularium [k. 579] Calissiensium nobiles Venceslaus patruus et Albertus, Stanislai filius, nepos illius, Domiechowsczy, non compulsi non coacti neque aliquo devio errore seducti, sani mente et corpore existentes amicorumque suorum salubri usi consilio ac matura intra se deliberatione prehabita sponte, libere et manifeste recognoverunt.

Quia ipsi in et super tota et integra villa et hereditate sua Kakawa districtus Calissiensis, cum omni eiusdem villae ac hereditatis iure, dominio et proprietate, et omnibus illius utilitatibus, usibus fructibus, redditibus, proventibus, censibus, attinentiis, pertinentiis <et ob>ventionibus universis, ita late, longe et circumferentialiter prout eadem villa et hereditas in suis metis et limitibus est distincta et dislimitata,

censum spiritualem duarum marcarum pecuniarum Polonicalium consuetarum, pro quolibet foesto Circumcisionis Domini anni singulis sub pignore domini capitanei Maioris Poloniae generalis fore solvendum, incipiendo ipsam solutionem a proxime venturo foesto Circumcisionis Domini, pro summa capitali triginta marcarum pecuniarum Polonicalium consuetarum, reverendo Alberto a Rosossycza praeposito conventus sancti Nicolai in Calisz et suo conventui moderno et pro tempore existenti, in vim ac titulum iustae reemptionis alias nawyderkoff resignaverunt, per praefatum praepositum ac suum conventum modernum et pro tempore existentem censum praefatum levandi, tenendi, habendi et possidendi ac in usus suos beneplacitos libere convertendi.

Super quo memoriale iudicio est solutum.

Or.: Kalisz Z. 21, rezygnacje/indukta, 1537; 1539; 1542; 1547; 1550; 1552-1555; 1557-1558; 1565; 1571; 1580; 1583-1584; 1586, k. 577v-578.

NN. Wacław i Wojciech s. Stanisława, stryj z bratankiem (nepos) Domiechowscy sprzedają ks. Wojciechowi z Rososyczy prepozytowi konwentu św. Mikołaja w Kaliszu czynsz kościelny 2 grz. od 30 grz., zapisany na wsi Kakawa w pow. kaliskim.